„Jóhannes Stefánsson, sem stýrði starfsemi Samherja í Namibíu, hafði sumarið 2016 uppi áform um að fara á bak við Samherja og hefja rekstur í Namibíu með öðru útgerðarfyrirtæki og nýta sér þau viðskiptasambönd sem félög tengd Samherja höfðu byggt upp í landinu. Í þessum þætti er í fyrsta sinn greint opinberlega frá þessum áformum. Eftir starfslok Jóhannesar fundust ítarleg minnisblöð sem Jóhannes hafði ritað við ýmis tilefni þau ár sem hann stýrði starfseminni í Namibíu. Ekkert í dagbókum Jóhannesar styður þær fullyrðingar sem hann setti fram í þættinum Kveik á RÚV 12. nóvember 2019. Raunar hafa ekki fundist nein önnur gögn sem styðja þær heldur en búið er að yfirfara meira en milljón skjöl í tengslum við rannsókn á starfseminni,“ segir í fylgitexta með nýju myndbandi frá Samherja.

Þar er um að ræða stutta stiklu sem kynntir væntanlegt myndband þar sem Samherjamenn gera Jóhannes Stefánsson, fyrrverandi starfsmann sinn, að skotmarki. Jóhannes var uppljóstrari í fréttaskýringaþættinum Kveiki þar sem hann lýsti meintum mútugreiðslum Samherja til ráðamanna í Namibíu í skiptum fyrir hrossamakrílkvóta. Sagðist Jóhannes hafa annast greiðslurnar í samráði við Þorstein Má Baldvinsson, forstjóra Samherja, en í myndbandinu er því haldið fram að Jóhannes hafi verið einn að verki og aðrir stjórnendur fyrirtækisins hafi ekki vitað um greiðslurnar. Námu þær samtals um hátt í einn milljarð íslenskra króna.