Þórólfur Guðnason sóttvarnalæknir hefur verið gagnrýndur fyrir að kalla afbrigði af kórónuveirunni „Frakkaveiru“. Um er að ræða stofn veiru sem hefur verið þrálátur í þriðju bylgju faraldursins hér á landi og er rakinn til franskra ferðamanna sem voru smitaðir og fóru ekki að sóttvarnareglum.
Guðlaug M. Jakobsdóttir, forseti stjórnar Alliance Française, segir um þetta við Morgunblaðið: „Við megum ekki vera að draga þjóðir í einhverja dilka út af svona tilfellum. Þetta eru einstaklingar sem
höguðu sér óábyrgt og það er alveg sama hvaðan þeir koma, þetta var bara óábyrg hegðun.“
Ummæli Þórólfs sem Guðlaug gagnrýnir voru orðrétt svona, en hann létu þau falla í viðtali við Stöð 2: „Þessi Frakkaveira, sem við getum kannski kallað svo, er yfirgæfandi svolítið núna.“
Alþekkt er að Donald Trump Bandaríkjaforseti hefur kallaða kórónuveiruna Kínaveiru enda á hún rætur sína að rekja til Wuhan-héraðs í Kína. Hefur þetta orðalag verið gagnrýnt harðlega.
Skoðanadálkurinn Staksteinar í Morgunblaðinu tekur málið upp og kemur Þórólfi til varnar. Höfundur segir þessa afstöðu Guðlaugar vera ofurviðkæmni. Bent er á að hótel bjóði gjarnan upp á enskan morgunverð þó að þau séu víðsfjarri Englandi og talað sé um franska kossa án þess að þar sé lýst afstöðu til franskrar menningar. Neikvæðir og jákvæðir atburðir séu oft kenndir við einstök ríki.
Alþekkt sé að veirur og veikindi séu kennd við tiltekin lönd, til dæmis spænska veikin sem hafði lítið með Spán að gera. Staksteinar telja það vera nýstárlega viðkvæmni að kvarta undan því að kórónuveiran sé kölluð Kínaveira. Síðan segir:
„Nýjasta dæmið um þessa viðkvæmni er svo að fundið var að því að sóttvarnalæknir skyldi kenna afbrigði veirunnar, sem tveir franskir ferðamenn báru hingað til lands og dreifðu með óábyrgum hætti, við Frakkland. Er þetta virkilega aðfinnsluvert?“