Valur og Breiðablik verma tvö efstu sætin í deildinni og var því ljóst að bæði lið vildu sækja þrjá punkta til að halda sér almennilega í toppbaráttunni.
Hér fyrir neðan má sjá úrslitin úr leikjum kvöldsins:
Valur 3-1 FH
Elín Metta Jensen braut ísinn fyrir Val á 38. mínútu og Hlín Eiríksdóttir jók forystu Vals með marki skömmu síðar. Valur fór því inn í seinni hálfleikinn með tveggja marka forystu.
Þegar 62 mínútur voru liðnar af leiktímanum skoraði Bergdís Fanney Einarsdóttir þriðja mark Valsara og gerði drauma FH-inga um að koma til baka mun fjarlægari. FH gafst þó ekki upp en Madisson Santana Gonzales skoraði fyrsta og eina mark FH á 78. mínútu. Lokaniðurstaðan því 3-1 fyrir Val.
Fylkir 0-4 Breiðablik
Karólína Lea Vilhjálmsdóttir var ekki lengi að koma Breiðablik yfir en hún skoraði fyrsta mark leiksins á 10. mínútu. Einungis fjórum mínútum seinna bætti Karólína við öðru markinu sínu og kom Breiðablik í 2-0. Á 29. mínútu skoraði Berglind Björg Þorvaldsdóttir þriðja mark Blika. Skömmu síðar skoraði Fylkiskonan Katla María Þórðardóttir í sitt eigið mark og var staðan í hálfleik 0-4 fyrir Breiðablik.
Eftir markaveisluna í fyrri hálfleik skoraði þó hvorugt liðanna í seinni hálfleik og endaði leikurinn því 0-4.
Góð þrjú stig fyrir Breiðablik sem heldur toppsætinu en Valur fylgir fast á eftir þeim þar sem einungis 2 stig skilja á milli liðana. Breiðablik á þó leik til góða og gæti bætt muninn í þeim leik.
Það eitt er víst að von er á hörkuslag hjá þessum tveimur liðum um toppsæti deildarinnar.