Lögreglumaðurinn Derek Chauvin, sem ákærður hefur verið fyrir morðið á George Floyd, hefur nú einnig verið ákærður fyrir skattsvik. Eiginkona Dereks, sem nú stendur í skilnaði við Derek er einnig ákærð í sama máli. NBC News greindi frá.

Er þeim gefið að sök að hafa ekki skilað inn skattframtölum og vantalið tekjur þeirra hjónanna. Ennfremur eru þau ákærð fyrir að hafa ekki greitt söluskatt af bifreið sem þau keyptu með því að skrá bifreiðina í öðru ríki en hún var notuð. Eiginkona Dereks, Kellie May Chauvin, sótti um skilnað eftir að George Floyd málið kom upp. Dauði George Floyd í haldi Dereks og þriggja annarra lögreglumanna, sem allir hafa verið ákærðir fyrir aðild sína að málinu, vakti upp gríðarlega reiði og mótmælaöldu sem ekki sér fyrir endann á.

Í nótt voru mótmæli víða um Bandaríkin og hefur Donald Trump beitt alríkislögreglumönnum á mótmælendur og var borgarstjóri Portland einn fórnarlamba táragas þeirra síðastliðna nótt.

Í ákærunni kemur fram að þau hjónin hafi vantalið tekur uppá 464 þúsund dollara á 5 ára tímabili, eða sem nemur 63 milljónum og skuldi nú skattinum að minnsta kosti fimm milljónir íslenskra króna.

Líklega eru skattabrotin ekki efst í huga Dereks, sem hefur nú misst vinnu sína, fjölskyldu og stendur frammi fyrir allt að 40 ára fangelsisdómi, verði hann fundinn sekur um manndráp af ásetningi.