Fréttablaðið skýrir frá þessu í dag.
„Stór hluti af þeim áskorunum sem við stöndum frammi fyrir núna, er að Ísland er ekki lengur samkeppnishæft þegar kemur að raforkuverði. Sú staða er grafalvarleg, sérstaklega í ljósi hægari umsvifa í öðrum útflutningsgreinum.“
Hefur Fréttablaðið eftir Jóhanni Þór Jónssyni formanni Samtaka gagnavera. Hann setur spurningarmerki við fyrirætlanir Landsnets um fjárfestingu upp á tugi milljarða í flutningskerfi sínu.
„Fyrir liggur í áætlunum að þetta getur valdið töluverðum hækkunum á dreifikostnaði stórnotenda. Að okkar mati þurfa ákvarðanir um fjárfestingar í flutningskerfi að byggja á samkeppnishæfni orkumarkaðarins og orkufrekra fyrirtækja. Þær mega ekki byggja einungis á sjónarmiðum um raforkuöryggi og hag orkuframleiðenda.“
Er haft eftir honum.
Iðnaðarráðherra, Þórdís Kolbrún Gylfadóttir, fékk fyrr á árinu Fraunhofer/Ecofy ráðgjafarstofuna til að gera úttekt á samkeppnishæfni stórnotenda hér á landi, með sérstaka áherslu á raforkukostnað.
Haft er eftir Jóhanni að þessi úttekt þurfi að taka ýmis sérkenni íslenska orkumarkaðarins til greina. Nefndi hann þar til dæmis flutningskostnað og ósveigjanleg atriði raforkusamninga.