Samkomuhámark fer úr 200 upp í 500 frá og með 15. júní og erlend heilbrigðisvottorð verða ekki tekin gild á Keflavíkurflugvelli, heldur þurfa allir sem koma til landsins að fara í skimun á flugvellinum.

Þetta er meðal þess sem kom fram á upplýsingafundi í Ráðherrabústaðnum kl. 14 í dag í tilefni að rýmkaðra reglna í samkomubanni sem taka gildi 15. júní.

Þórólfur Guðnason sóttvarnalæknir sagði að verkefnið væri lagt upp eins og rannsóknarverkefni. Það væri í sífelldu endurmati og þannig verði hægt að breyta áherslum, draga úr skimunum frá ákveðnum löndum og auka skimanir eða hætta alfarið að skima ferðamenn frá öðrum löndum.

Alma Möller landlæknir minnti á mikilvægi smitrakningarappsins og undirstrikaði að það stríddi ekki gegn persónuvernd. Upplýsingarnar úr appinu séu á snjallsímunum en þær séu ekki vistaðar í skýi.

Ferðamenn verða hvattir til að hlaða niður appinu og ný útgáfa á að vera til fyrir 15. júní. Appið á að koma niðurstöðum skimunarinnar til ferðamanna og auðvelda ferðamönnum að hafa samband við heilsugæslur á landinu. Ekki er talið gerlegt að skylda ferðamenn til að hlaða niður appinu en höfðað verður til skynsemi ferðamanna. Tungumálum verður bætt við og til skoðunar er að bæta við Bluetooth virkni við appið svo hægt sé að senda skilaboð á þá sem mögulega hafa komist í tæri við smitaða.