Kornungur maður, fæddur árið 2001, var á föstudaginn sakfelldur í Héraðsdómi Vestfjarða fyrir líkamsárás og vopnalagabrot. Atvikið átti sér stað þann 21. desember 2019, í anddyri skemmtistaðarins Edinborg Bístró, í Edinborgarhúsinu Aðalstræti 7 á Ísafirði.
Maðurinn var sakfelldur fyrir að hafa slegið annan mann hnefahöggi í andlitið og í kjölfarið slegið kærustu mannsins hnefahöggi í andlit svo að hún féll í gólfið. Maðurinn sem varð fyrir höggi sakborningsins hlaut mar í kringum auga og rispu fyrir neðan augað. Konan fékk 3 cm bólgu á höfði.
Maðurinn var einnig sakfelldur fyrir að hafa borið bitvopn á sér á almannafæri án nægjanlegs tilefnis. Hann játaði brot sín skýlaust. Það, auk þess að hann hefur ekki brotið af sér áður, leiddi til vægari refsingar. Hins vegar var það virt til refsiþyngingar að árásin var tilefnislaus.
Var árásarmaðurinn ungi dæmdur í 30 daga skilorðsbundið fangelsi. Hann þarf að greiða tæplega 130.000 krónur í sakarkostnað.
Engum sögum fer af miskabótum í dómnum. Annaðhvort koma þær við sögu í einkamáli vegna árásarinnar eða ekki hefur verið krafist miskabóta.
