Áhöfnin á TF-EIR, þyrlu Landhelgisgæslunnar, sótti slasaðan sjómann um borð í togara sem staddur var um 20 sjómílur suður af Krísuvíkurbergi í dag. TF-EIR var komin að togaranum um hádegisbil og hífingar gengu vel. Sigmanni var slakað niður í togarann og var skipverjinn hífður um borð í þyrluna skömmu síðar. Að hífingum loknum var flogið á Reykjavíkurflugvöll þar sem sjúkrabíll beið hins slasaða.
Þrátt fyrir að ekki sé grunur um COVID-19 smit fara áhafnir Landhelgisgæslunnar að öllu með gát og verja sig fyrir smiti með andlitsmöskum og hönskum eins og sjá má.
Meðfylgjandi myndir sendi tók áhöfnin á togaranum meðan hífingarnar fóru fram. Að auki er mynd af Kolbeini Guðmundssyni, sigmanni Landhelgisgæslunnar.
Jafnframt hafa tvær af þyrlum Landhelgisgæslunnar, séraðgerðasveit LHG á varðbátnum Óðni og áhöfnin á eftirlitsflugvélinni TF-SIF leitað að Söndru Líf Þórarinsdóttur Long sem Lögreglan á höfuðborgarsvæðinu lýsti eftir í morgun. Bæði var leitað snemma í morgun og eftir hádegi. Þar sem þyrlur, flugvél og varðbátur Landhelgisgæslunnar hafa sinnt útköllum í dag hefur töluvert álag verið á stjórnstöð Landhelgisgæslunnar í Skógarhlíð.
