Keppendur í fegurðarsamkeppninni Miss Universe Iceland voru opinberaðir fyrir stuttu og því fannst DV ekki úr vegi að minnast þeirra fegurðardrottninga sem hafa söðlað um og hlotið landsfrægð fyrir annað en bara fegurðina.
Fjölmargar þekktar konur spreyttu sig í fegurð í Fegurðarsamkeppni Reykjavíkur árið 1995. Meðal keppenda voru Berglind Icey Ólafsdóttir fyrirsæta sem hefur gert garðinn frægan í Bandaríkjunum, Alexía Björg Jóhannesdóttir leikkona, Bryndís Ásmundsdóttir, leik- og söngkona, og Hrafnhildur Hafsteinsdóttir, fyrrverandi framkvæmdastjóri Félags kvenna í atvinnurekstri. Það var Berglind sem var krýnd ungfrú Reykjavík, Bryndís var vinsælasta stúlkan og Hrafnhildur var kosin besta ljósmyndafyrirsætan. Svo fór að Hrafnhildur bar sigur úr býtum í Fegurðarsamkeppni Íslands það árið.
Árið 1993 vantaði ekki keppnisskapið í konurnar sem kepptu um titilinn í Fegurðarsamkeppni Íslands. Meðal keppenda voru Andrea Róbertsdóttir athafnakona og Brynja X Vífilsdóttir, sem var um tíma ein farsælasta fyrirsæta landsins. Andrea hlaut tvenn verðlaun í keppninni, fyrir fallegustu leggina og var vinsælasta stúlkan, en Brynja endaði í þriðja sæti.
Sjónvarpsstjörnuna Ragnhildi Steinunni Jónsdóttur þarf vart að kynna en hún varð landsmönnum kunn þegar hún varð fegurðardrottning Íslands árið 2003 eftir að hún bar sigur úr býtum í Fegurðarsamkeppni Suðurnesja. Ragnhildur hefur unnið við sjónvarp nánast frá krýningu og er nú aðstoðardagskrárstjóri RÚV. Tinna Alavis keppti einnig í Ungfrú Ísland þetta árið og komst á pall, en hún er einn vinsælasti bloggari landsins.
Ragnhildur Steinunn krýndi arftaka sinn í Ungfrú Ísland árið 2004, fegurðardísina Hugrúnu Harðardóttur frá Selfossi. Í öðru sæti varð Sigrún Bender flugmaður og þriðja sætið vermdi leikkonan Halldóra Rut Bjarnadóttir, sem hefur vakið mikla athygli með leikhópnum RaTaTam.
Fjölmiðlakonan Ingibjörg Dögg Kjartansdóttir er mikilsvirt í sínum bransa og er ritstjóri Stundarinnar. Ingibjörg tók þátt í Fegurðarsamkeppni Austurlands árið 1997 en hafði ekki erindi sem erfiði
Ómögulegt er að sleppa Manuelu Ósk Harðardóttur úr þessari upptalningu, en hún er eigandi Miss Universe Iceland-keppninnar. Manuela var krýnd ungfrú Ísland árið 2002 í frægum, rauðum kjól sem hnefaleikakappinn Mike Tyson keypti handa henni. Í dag er Manuela einn vinsælasti áhrifavaldur landsins og stórtækur fyrirtækjaeigandi.
Bryndís Schram var aðeins nítján ára þegar hún var krýnd ungfrú Ísland árið 1957. Í framhaldinu lærði hún leiklist í Þjóðleikhússkólanum og sló í gegn sem umsjónarkona Stundarinnar okkar. Þá hefur hún verið iðin í leikhúsgagnrýni í gegnum tíðina og sinnt ýmsum öðrum störfum.
