„Kl 11 í morgun bókaði ég tíma hjá heimilislækni kl 13:20. Ekki amaleg þjónusta það. Vill svo til að heilsugæslan í hverfinu mínu er einkarekin, skil ekki af hverju sumt fólk er svona ofboðslega á móti þessu.“

Þetta sagði Katrín Atladóttir, borgarfulltrúi Sjálfstæðisflokksins, á Twitter-síðu sinni í gær. Óhætt er að segja að færslan hennar hafi vakið talsverða athygli og spunnust talsverðar umræður um kosti og galla einkarekinnar heilbrigðisþjónustu. Flestir eru á því að sú staðreynd að um einkarekna heilsugæslu hafi verið að ræða hafi ekki skipt höfuðmáli upp á það hvenær Katrín fékk tíma.

Einkarekstur ekki endilega breytan

„Ég ætlaði að fá tíma hjá heimilislækni á einkareknu heilsugæslunni í hverfinu mínu í desember og það voru fjórar vikur í lausan tíma þannig að ég mætti á vaktina. Þannig að ég held að einkarekstur sé ekki endilega breytan sem gerði þetta að verkum í þínu tilfelli,“ segir Haukur Bragason, athafnamaður og þungavigtarmaður í þjóðfélagsumræðunni á Twitter.

Brynhildur Bolladóttir, upplýsingafulltrúi Rauða krossins, bendir á að hún hafi pantað tíma um kvöld á hverfisheilsugæslunni sinni og mætt fyrir hádegi næsta dag. Hún sé ekki einkarekin. Brynhildur spyr á móti: „Ég skil ekki af hverju svona margir eru á móti þessu? …“

Í umræðunum kemur fram að heilsugæslan sem Katrín nefnir sé í Lágmúlanum. Karl segir að sennilega hafi einhver dottið út og þess vegna hafi Katrín fengið tíma jafn fljótt og raun ber vitni. „Ég reyndi að panta tíma í gær og fyrsti lausi tími var í næstu viku.“

Jón segir opinbera kerfið hentugra

Jón Gnarr, fyrrverandi borgarstjóri, segir það sína upplifun að opinber heilbrigðiskerfi séu bæði betri og hagkvæmari en einkarekin. „Kerfið í USA er td steypa. Þá á heildina litið. Hluta má einkavæða, eins og td heimilislækna. Annars erum við svo mikið mikrósamfélag að maður veit ekki.“

Leikarinn Jóhannes Haukur Jóhannesson blandar sér einnig í umræðuna og svarar Katrínu: „Frábært. EN SJALLARNIR FÁ EKKI AÐ EINKAVÆÐA HEILBRIGÐISKERFIÐ!!! ….bara smá. Ekki of mikið. SMÁ!! PÍNU! ….aðallega það sem myndi henta mér og mínum. OG ég vil ekki að neinn með Krabbamein þurfi að rífa upp veskið. Aldrei.“

Einn segist hafa upplifað íslenska og bandaríska heilbrigðiskerfið og niðurstaðan um hvort sé betra sé mjög skýr. „Eftir 5 ára dvöl í USA get ég sagt þér að munurinn á einka- og ríkisreknu heilbrigðiskerfi er sá að ég vil miklu frekar búa á Íslandi en USA. Því miður virðumst við svo vera að reyna að elta brotna kerfið þeirra t.d með einkareknu heilsugæslunni þinni,“ segir hann.

Sigurgeir Jónasson, stjórnarmaður í SUS í suðvesturkjördæmi, segir þó að mikill munur sé á því kerfi sem er við lýði í Bandaríkjunum og því kerfi sem Katrín – og hann sjálfur – hafa kallað eftir. „Munurinn á USA og Íslandi (það sem ég og Katrín viljum) er einkavætt heilbrigðiskerfi vs einkarekið heilbrigðiskerfi. Í einkareknu borga Sjúkratryggingar Íslands fyrir þig en í USA borgar þú sjálfur (nema þú sért með sérstaka tryggingu).“

Hvað segja þú lesandi góður? Ert þú fylgjandi eða andvíg/ur einkarekinni heilbrigðisþjónustu?