Jóhann Þorvarðarson pistlahöfundur segir frá því þegar hann fór nýlega á Slysa- og bráðadeild Landspítalans. Hann segir ástandið vera slæmt og kennir ríkisstjórninni um.

„Aðili sem ég þekki átti erindi á Slysa- og bráðadeild nýlega og fylgdi ég viðkomandi til öryggis,“ segir Jóhann í pistli sínum sem birtist á Miðjunni í dag. „Starfsfólkið var frábært, en aðbúnaðurinn ömurlegur. Þrengsli um allt. Veikt og slasað fólk í rúmum um alla ganga og ofan í hvort öðru. Líka inn í kompum. Sjúklingum nánast staflað upp í sama rúmið. Hóstandi og emjandi í hálsmál hvors annars.“

Sjá einnig: 
Már áhyggjufullur og varar við: „Það er stórslys í aðsigi“ – Harðorður í Læknablaðinu

Jóhann segir samtöl og viðkvæmar persónuupplýsingar sjúklinga hafa heyrst skýrt á milli rýma og til ókunnugra vegna þessa. „Þarna er algjört delluástand!“ segir hann og bendir á að sjúklingurinn sem hann fylgdi hafi þurft að bíða í 7 klukkustundir eftir að fá fullkláraða þjónustu. „Og þykir það víst vel sloppið. Ég frétti af öðrum sjúklingi sem þurfti 12 tíma til að fá sína læknaþjónustu á bráðadeildinni. Svo margir eru sjúklingarnir að starfsfólk kemst ekki yfir verkefnin nema að búa til óhemju langar biðraðir. Svo er bara sagt að um fráflæðisvanda sé að ræða eins og það sé ekki alvarlegt.“

„Já, þetta lið skálar í kampavín og segir bara sorry“

Í pistlinum kennir Jóhann ríkisstjórninni um ástandið. „Allt þetta er í boði Svandísar hægri Svavarsdóttur heilbrigðisráðherra, Panamaprinsins Bjarna Ben fjármálaráðherra og formanns fjárlaganefndar Willum Þórs Þórssonar,“ segir hann og bætir við að Willum Þór hafi í nýlegum viðtölum krafist þess að bæði aðhald og sparnaður verði meiri á Landspítalanum.

„Já, þetta lið skálar í kampavín og segir bara sorry yfir dauðsfalli sjúklings sem var greindur ranglega vegna mikils álags á deildinni. Þrenningin sendir síðan upprétta löngutöng til þjóðarinnar í gegnum stífbónaðar rúður rokdýrra og nýrra ráðherrabíla. Það er nefnilega ekki til money fyrir þessa lífsnauðsynlegu deild. En það má alltaf kaupa nýjan ráðherrabíl handa hægri Kötu Jak. Það er nauðsynlegt!“

Hann botnar síðan pistilinn með því að skjóta á bæði Kristján Þór Júlíusson, sjávarútvegsráðherra, og lágan fjármagnstekjuskatt á Íslandi . „Já, meðan ég man, var ekki Kristján Þór Samherjaráðherra að lækka veiðileyfagjöld svo Samherja-illvirkið geti grætt fleiri skrilljónir? Og ég man líka að skattur á fjármagnstekjur er með því lægsta sem þekkist í heiminum. Mammon er nefnilega æðri þjóðinni hjá þessum sjálfshyggju-gömmum.“