Dæmdur kynferðisbrotamaður var gripinn glóðvolgur á dögunum þegar hann taldi sig vera að hitta þrettán ára stúlku í kynferðislegum tilgangi. Bresk samtök sem kalla sig PEST og berjast gegn barnaníðingum lögðu gildru fyrir manninn sem hann féll í.

Maðurinn er ekki nafngreindur í breskum fjölmiðlum enda ekki enn verið ákærður eða dæmdur fyrir þetta mál. Atvikið átti sér stað í borginni Hull en maðurinn hafði sett sig í samband við þrettán ára stúlku sem var í raun fullorðinn fulltrúi umræddra samtaka. Það var svo á miðvikudagskvöld að maðurinn taldi sig vera að fara hitta stúlkuna að fulltrúar samtakanna biðu hans.

Maðurinn brotnaði niður þegar hann áttaði sig á hvað var í gangi og játaði því að hafa losnað úr fangelsi fyrir aðeins fjórum mánuðum. Mun maðurinn hafa setið inni fyrir vörslu barnaníðsmynda. Þá játaði hann að hafa ætlað að hitta stúlkuna í kynferðislegum tilgangi og baðst afsökunar á því.

„Stelpan sem þú hélst að þú værir að hitta sagði að hún væri óörugg og hrædd við að stunda kynlíf, en þú sagðist vera harðákveðinn í að kenna henni,“ segir einn þeirra manna sem afhjúpuðu manninn. Hann spyr svo hversu oft hann hafi gert þetta áður.

Í lok myndbandsins sést þegar lögreglubíll kemur og má ætla að maðurinn hafi verið handtekinn í kjölfarið.

Sitt sýnist hverjum um þær aðferðir sem hópar eins og PEST beita í að klófesta barnaníðinga. Lögregluyfirvöld á Bretlandseyjum hafa gagnrýnt aðferðina, meðal annars í ljósi rannsóknarhagsmuna. Það sé best að láta sérþjálfaða lögreglumenn sjá um mál af þessu tagi.

„Það er ekkert mikilvægara en velferð barna en mál sem þessi verða að vera leidd af lögreglunni og öðrum löggæslustofnunum,“ sagði Alan Farrow, fulltrúi lögreglunnar í Humberside, í viðtali nýlega.