Oddný G. Harðardóttir, þingmaður og þingflokksformaður Samfylkingarinnar, segir við Eyjuna að henni lítist illa á aðgerðir núverandi ríkisstjórnar í efnahagsmálum, þar sem verið sé að færa einkaaðilum það sem ætti að vera á höndum ríkisins.

Hún skrifaði í kvöld færslu á Facebook þar sem hún taldi upp nokkur atriði þar sem henni þykir full geyst farið í frjálshyggju:

• Það stendur til að stofna þjóðarsjóð með arði af orkufyrirtækjunum okkar sem einkaaðilar eiga að ávaxta í útlöndum.
• Það stendur til að draga tennurnar úr Samkeppniseftirlitinu með breytingum á Samkeppnislögum.
• Það stendur til að selja hluti ríkisins í bönkunum.
• Það er búið að setja lög um Seðlabankann sem veikja bæði bankann og Fjármálaeftirlitið.
• Það eru 11 ár frá hruni og gerendur í íslensku efnahagslífi eru margir þeir sömu og fyrir hrun.
• Það eru athafnamenn í viðskiptalífinu sem eiga áhrifamikla fjölmiðla.
• Það er verið að búa í haginn…

Eftirlitsstofnanir þurfi að virka

Þarna nefnir Oddný nokkur atriði sem svipa til umhverfisins í efnahagsmálum á Íslandi í aðdraganda hrunsins. Hún segist ekki vera að spá öðru hruni, en aðeins eftirlitsstofnanir standi þó í vegi fyrir öðru slíku, sem er kannski ekki mjög traustverðugt í ljósi sögunnar og þeirrar staðreyndar að Ísland er á gráum lista FATF vegna óviðunandi lagaumhverfis gegn peningaþvætti og fjármögnun hryðjuverka:

„Nei ekki annað hrun en það er verið að búa í haginn fyrir að fáir græði meira með því að færa rekstur og umsýslu fjármagns frá ríkinu til einkaaðila. Það gæti síðan leitt til hruns eða efnahagsþrenginga einkum ef eftirlitsstofnanir geta ekki sinnt raunverulegu eftirliti vegna veikingar þeirra með lögum.“