Jonathan Paul Koppenhaver, fyrrverandi UFC-bardagakappi, hefur verið dæmdur í lífstíðarfangelsi fyrir að ráðast með fólskulegum hætti að fyrrverandi kærustu sinni, klámleikkonunni Christy Mack, árið 2014.

Dómur var kveðinn upp í Nevada í gær og þarf Koppenhaver að dúsa á bak við lás og slá næstu 36 árin hið minnsta, en að þeim tíma liðnum á hann rétt á að sækja um reynslulausn. Þá verður hann orðinn 71 árs.

Illa farin Christy var mjög illa farin eftir árásina.

Jonathan, sem gekk undir nafninu War Machine í búrinu, ruddist inn á heimili Christy vorið 2014 en nokkrum mánuðum áður höfðu þau hætt saman. Hann gekk í skrokk á henni með fólskulegum hætti, hélt henni fanginni og braut gegn henni kynferðislega. Eftir árásina birti Christy myndir af sér sem sýndu áverkana sem hún hlaut.

Ákæran gegn Jonathan var í 34 liðum og var hann sakfelldur fyrir 29 þeirra. Jonathan, sem er 35 ára, var fullur iðrunar þegar hann tjáði sig í dómsal áður en dómur féll. Líkti hann sér við NFL-leikmanninn fyrrverandi Aaron Hernandez sem svipti sig lífi í fangaklefa fyrir skemmstu og sagði að hann ætti skilið að liggja í gröf við hlið hans.

Christy Mack lýsti því fyrir dómi að árásin hefði haft slæmar afleiðingar í för með sér og síðustu ár hefðu verið erfið. Hún kveðst enn óttast að Jonathan muni vinna henni mein ef hann losnar úr fangelsi. „Ég veit að hann mun drepa mig þegar hann losnar.“

Jonathan sagðist hins vegar sjá eftir gjörðum sínum en sagði að kvíði, þunglyndi og sjálfsvorkunn ættu sinn þátt í óútreiknanlegri hegðun hans.

Eftir að dómur féll hvatti Christy þær konur sem búa við heimilisofbeldi að leita sér hjálpar. Þær væru ekki einar í þessum sporum.