Það eru margir Íslendingar sem þekkja það að spila í Hollandi en margir taka sitt fyrsta skref í atvinnumennsku þangað.

Einn af þeim er Albert Guðmundsson en hann er í dag á mála hjá AZ Alkmaar en var áður hjá Heerenveen og PSV Eindhoven.

Albert þekkir það vel að spila í næst efstu deild Hollands og fengum við hann til að útskýra aðeins fótboltann í Hollandi.

Albert var gestur í hlaðvarpsþættinum 90 mínútur fyrir helgi hér á 433.is og svaraði þessari spurningu.

,,Ég ætla ekki að segja að hún sé góð. Það er enginn tilbúinn að kyngja stoltinu og segja að þeir séu ekki nógu góðir í fótbolta og leggja rútunni,“ sagði Albert um næst efstu deild.

,,Það vilja allir spila frá markmanni og reyna að verða góðir í fótbolta. Þetta er svolítið útaf Johan Cruyff.“

,,Það voru allir til í að spila hápressu þannig þetta var skemmtilegur bolti með mikið af mörkum.“

,,Það hefur oft verið sagt að það henti sóknarmönnum að spila í Hollandi en það kemur ekkert upp í hendina á neinum.“

,,Alfreð [Finnbogason] skoraði ekki bara mörk því hann spilaði í Hollandi, hann er geggjaður striker og skorar því fullt af mörkum.“