Isavia tilkynnti á fundum með starfsmönnum í morgun að félagið hafi gripið til uppsagna á Keflavíkurflugvelli. Um er að ræða starfsmenn sem starfa meðal annars við öryggisleit og farþegaþjónustu.

Uppsagnirnar ná til 19 starfsmanna og til viðbótar býðst 15 starfsmönnum lægra starfshlutfall. Áður hafði verið dregið úr sumarráðningum hjá Isavia ásamt því að fjölmörgum fyrirhuguðum ráðningum hafði verið frestað og breytingar verið gerðar á fyrirkomulagi vaktakerfa. Þessar aðgerðir hafa þegar náð til ýmissa starfsstöðva Isavia, þar á meðal til skrifstofustarfa.

Þetta kemur fram í tilkynningu sem Isavia sendi fjölmiðlum í dag. Í henni kemur fram að rekja megi uppsagnirnar til brotthvarfs Wow air í mars síðastliðnum en einnig breyttrar flugáætlunar Icelandair í kjölfar kyrrsetninga á MAX-vélum Boeing. „Umsvif í þjónustu vegna millilandaflugs eru minni en áætlanir gerðu ráð fyrir, því er óhjákvæmilegt annað en að grípa til þessara aðgerða.“