KR harmar þau ummæli sem Björgvin Stefánsson lét falla um Archange Nkumu leikmann Þróttar í gær. Björgvin, leikmaður KR í Pepsi Max-deild karla, lét ummælin falla í beinni útsendingu á Haukar TV í gær. Björgvin sá um að lýsa leik Hauka og Þróttar R. á Haukar TV en þau lið áttust við í Inkasso-deild karla.

Björgvin er fyrrum leikmaður Hauka en hann tjáði sig um Nkumu, leikmann Þróttar. ,,Þetta er það sem ég er alltaf að segja, það er svo stutt í villimannseðlið hjá svarta manninum,“ sagði Björgvin.

KSÍ er með málið á borði sínu, líkur eru á að Björgvin fái fimm leikja bann fyrir rasísk ummæli sín. Pape Mamadou Faye á ættir að rekja til Senegal en er íslenskur ríkisborgari, hann ritar um málið á Facebook síðu sinni í dag

„Þetta er það sem ég er alltaf segja. Það er svo stutt í villimannseðlið hjá svarta manninum. Þetta sagði leikmaður KR í beinni útsendingu í gærkvöldi,“ skrfar Pape á Facebook.

Það kemur Pape sem er dökkur að hörund ekki á óvart að svona ummæli falli á Íslandi.

„Ég persónulega er ekki í sjokki yfir því að þetta hafi gerst hér á landi, en að þetta skuli koma frá þessum fávita sem ég hafði lengi haldi að væri nettur gæji og allt það er það sem kemur mér mest á óvart í þessu. Svona er ekki boðlegt árið 2019, manni hefur fundist eins og hlutinir væru að lagast en svo kemur eitthvað svona og setur strik í reikninginn.“

Bræðurnir Logi Pedro og Unnsteinn Manúel Stefánssynir, leggja orð í belg. ,,Núna þarf KSÍ – Knattspyrnusamband Íslands að taka á þessu. Að taka ekki á svona ummælum er að gefa þeim grænt ljós, og þetta er helvíti gróft brot,“ skrifar Logi.

Unnsteinn tekur undir það. „Ótrúlega sérstakt, alls ekki eitthvað sem hægt er að afskrifa sem „dómgreindarleysi“.“