Jón Trausti Lúthersson fær 1,8 milljónir í bætur frá íslenska ríkinu vegna gæsluvarðhalds sem honum var gert að sæta í tengslum við rannsókn á andláti Arnars Jónssonar Aspar árið 2017. Jón Trausti stefndi íslenska ríkinu vegna varðhaldsins og fór fram á 10,5 milljónir í skaðabætur.
Sex voru hnepptir í gæsluvarðhald í tengslum við rannsókn málsins og var Jóni Trausta gert að sæta 21 degi í einangrun. Ríkið hafnaði bótaskyldunni á þeim grundvelli að Jón Trausti hefði sjálfur valdið eða stuðlað að gæsluvarðhaldinu með því að vera ósammvinnuþýður við rannsóknina en hann er sagður hafa gefið litlar eða óljósar skýringar á atburðarás og meinaði lögreglu aðgang að síma sínum.
Dómari féllst á málsvörn ríkisins að hluta. Jón Trausti hefði með framgöngu sinni við rannsókn og með tengslum sínum við málið stuðlað að einhverju leiti að því að gæsluvarðhald var talið nauðsynlegt, en þó hefði það varað lengur en nauðsynlegt væri á grundvelli rannsóknarhagsmuna.
Fyrir liggur að stefnandi var ásamt fleira fólki nálægur brotaþola þegar lögregla kom á staðinn. Einnig lá fyrir að stefnandi hafði komið þangað í fylgd með öðrum sem grunaðir voru um aðild að meintum brotum. Þá var fatnaður hans blóðugur og ekki lá fyllilega fyrir í upphafi hvað gerðist eða hver þáttur hvers og eins var í því sambandi
Verður að leggja til grundvallar að undangengin aðkoma stefnanda að málinu, sem felldi á hann grun og leiddi til þess að hann var handtekinn, sem og fyrrgreind skýrslugjöf hans, hafi verið af þeim toga að hann hafi sjálfur stuðlað að handtökunni í upphafi og því að henni var viðhaldið uns hann var færður fyrir dómara daginn eftir. Ber því að fella niður bætur til hans vegna handtökunnar.
Jón Trausti naut gjafsóknar við rekstur málsins, en dómara þótti reikningur lögmannsins, Sveins Andra Sveinssonar, alltof hár. Gjafsókn var því ákveðin að álitum og reidd úr ríkissjóð.
Fyrir liggur að stefnandi nýtur gjafsóknar í máli þessu. Í málskostnaðaryfirliti stefnanda greinir að lögmaður hans hafi varið sextíu og sex tímum við meðferð málsins og að tímagjald lögmannsins sé 40.000 krónur án virðisaukaskatts.
