Landsliðsmarkvörðurinn Sonný Lára Þráinsdóttir hefur skrifað undir nýjan samning við Breiðablik og er nú samningsbundin félaginu til næstu tveggja ára.
Sonný Lára hefur verið einn mikilvægasti leikmaður Blika í mörg ár, en hún kom til félagsins frá Fjölni árið 2014. Síðan þá hefur hún lokað rammanum í Kópavoginum og spilað alls 164 leiki fyrir liðið.
Sonný Lára hefur verið fastamaður í hópnum hjá A-landsliðinu í mörg ár og stóð meðal annars í marki Íslands nú fyrr í mánuðinum í Algarve-bikarnum í Portúgal. Þá er hún á leið til Suður-Kóreu í dag þar sem landsliðið mætir heimakonum í vináttuleikjum.
,,Blikar lögðu mikla áherslu á að halda Sonný hjá félaginu, enda er mikilvægi hennar og reynsla afskaplega dýrmætt fyrir liðið,“ segir á heimasíðu félagsins.
