Manchester United er komið áfram í Meistaradeild Evrópu eftir leik við frönsku meistarana Paris Saint-Germain í gær.

Um var að ræða seinni leik liðanna en United tapaði fyrri leiknum 2-0 á sínum heimavelli, Old Trafford. Það var boðið upp á skemmtilegan leik í Frakklandi þar sem United hafði betur með þremur mörkum gegn einu.

Romelu Lukaku var heitur í gær og skoraði tvö mörk fyrir gestina í fyrri hálfleik. Juan Bernat skoraði þó einnig fyrir PSG en staðan var 2-1 eftir fyrstu 45.

Á 90. mínútu leiksins þá fékk United svo vítaspyrnu en Presnel Kimbempe fékk þá knöttinn í höndina innan teigs og steig Marcus Rashford á punktinn. Rashford skoraði af miklu öryggi framhjá Gianluigi Buffon í markinu og tryggði United 3-1 sigur og fer liðið því áfram á mörgkum skoruðum á útivelli.

Ingi Björn Grétarsson var staddur í vinnu sinni þegar leikurinn fór fram. Hann fylgdist þó með leiknum í París. ,,Vissu þið að United fékk víti á 90 min á móti PSG áðan, ég sá það í sjónvarpinu,“ skrifar Ingi á Facebook.

Vinir Inga hafa gaman af myndbandinu og einn spyr. ,,Áttu ekki að vera að vinna?.“ Ingi svaraði léttur og sagðist hafa sleppt kaffinu.

Hann birtir svo myndband úr öryggismyndavél á svæðinu þar sem viðbrögð hans náðust. Óhætt er að segja að Ingi hafi verið ansi glaður.

Atvikið má sjá hér að neðan.