42 stiga frost í Íslendingabyggðinni gömlu, Gimli í Manitoba. Vinur minn, Jón Grétar Axelsson, sem þar býr setti þetta á vefinn.

Þetta er kuldi sem við hér á Íslandi getum vart ímyndað okkur. Mesta frost á Íslandi á þessari öld er rúm 30 stig samkvæmt upplýsingum Veðurstofunar.  En slíkt er yfirleitt mjög staðbundið og stendur í afar stuttan tíma.

Kuldaköstin á sléttum Kanada geta varað lengi. Það er til dæmis vonlaust að skilja eftir bíla utandyra nema þeir séu í sambandi við rafmagn. Hér er lítil frétt úr blaði sem kallaðist Bergmálið frá því 30. janúar 1899, nákvæmlega 120 árum áður en Jón Grétar setur færslu sína á alnetið. „Grimdar frost og oftast nær stormur með.“

En hvernig ætli löndum okkar sem flúðu vesöld og vosbúð á Íslandi og fluttu til Vesturheims hafi orðið við þegar þeir lentu í svona kulda. Þeir fóru reyndar flestir á miklu harðindaskeiði á Íslandi – það voru miklar vetrarhörkur en köld sumur með lélegri grassprettu.

Það er svosem ekki vandamál í Manitoba. Sumrin þar geta orðið afar heit.

En er að horfa út á Winnipegvatn í 42 gráðu frosti.