Skömmu fyrir miðnætti var maður handtekinn í miðborginni grunaður um innbrot í bifreiðar. Hann var vistaður í fangageymslu. Um klukkan tvö í nótt reyndi ökumaður að hlaupa frá lögreglumönnum eftir að akstur hans hafði verið stöðvaður. Hann náðist fljótt. Hann er grunaður um ölvun við akstur, vanrækslu á merkjagjöf og að fara ekki að fyrirmælum lögreglu.

Um klukkan hálf tíu í gærkvöldi var maður kýldur á bar í Mosfellsbæ og missti meðvitund. Hann skarst við eyra. Hann var fluttur á Slysadeild til aðhlynningar. Árásarmaðurinn var farinn af vettvangi þegar lögreglan kom.

Á sjöunda tímanum í gær var ofurölvi maður handtekinn í miðborginni. Hann var vistaður í fangaklefa. Á öðrum tímanum í nótt var akstur 18 ára stúlku stöðvaður í miðborginni en stúlkan hefur aldrei öðlast ökuréttindi.

Á öðrum tímanum í nótt var ökumaður kærður fyrir að aka gegn rauðu ljósi í Hafnarfirði, hann er einnig grunaður um að hafa verið undir áhrifum áfengis og fíkniefna. Skömmu fyrir miðnætti var ökumaður handtekinn í Breiðholti en hann er grunaður um að hafa verið undir áhrifum fíkniefna og að hafa ekið sviptur ökuréttindum.