Rússneskur maður sem hjó báðar hendur af konu sinni eftir að hún fór fram á skilnað var í gær dæmdur í 14 ára fangelsi. Málið þykir varpa ljósi á slæmar aðstæður kvenna í Rússlandi þar sem heimilisofbeldi hefur að hluta verið afglæpavætt.

Þegar Margarita tilkynnti manni sínum, Dimitry Grachyov, að hún ætlaði að skilja við hann varð hann sannfærður um að hún hefði haldið framhjá honum og hugstola af afbrýði.  Dimitri lokkaði Margaritu í tvígang út í skóg, þar sem hann hótaði henni lífláti í fyrra skiptið en í því seinna hjó hann af báðar hendur hennar við úlnlið.

Eftir aflimuna var Dimitry hinn kátasti og ók Margaritu á spítala á meðan hann endurtók ítrekað frasann „…svo mikið adrenalín“.

Árásin átti sér stað í desember árið 2017 en Dimitry var í gær dæmdur í 14 ára fangelsi fyrir verknaðinn. Margarita og hann eru í dag skilinn þrátt fyrir að Dimitry hafi hótað Margaritu morði ef hún biði hans ekki við lok fangavistarinnar.  Hélt hann í einlægni að þau gætu tekið upp þráðinn að nýju að lokinni afplánun þar sem nú hefði Margarita lært sína lexíu og þau orðinn kvitt.

Margarita leitaði, samkvæmt The Moscow Times, til lögreglu eftir fyrra tilvikið en fékk þar enga aðstoð og aðeins þremur dögum síðar varð hún tveimur höndum fátækari.

Málið þykir varpa ljósi á þær hættulegu aðstæður sem rússneskar konur búa við eftir að heimilisofbeldi var að hluta til afglæpavætt með lagabreytingu þar sem mönnum var gert refsilaust að beita maka sinn ofbeldi ef um fyrsta brot væri að ræða og afleiðingar minniháttar.