Drykkurinn White Russian er í eftirlæti hjá mörgum en hér er hann endurgerður í bollakökuformi. Fullkomið snarl fyrir teitið!
Múffur – Hráefni:
1 egg
120 ml rjómi
50 ml Bailey’s
100 g sykur
1/2 tsk. vanilludropar
120 g hveiti
1 tsk lyftiduft
smá salt
Aðferð:
Hitið ofninn í 180°C og takið til 8-10 möffinsform. Stífþeytið rjómann og blandið vanilludropum og Bailey’s saman við. Þeytið egg í lítilli skál og bætið því saman við rjómablönduna. Blandið sykrinum varlega saman við og hrærið síðan þurrefnum saman við. Deilið á milli möffinsforma og bakið í 18-20 mínútur. Leyfið kökunum að kólna og skerið síðan litlar holur í miðjuna fyrir fyllinguna. Passið að holurnar nái ekki alveg í gegnum kökurnar.
Fylling – Hráefni:
50 g dökkt súkkulaði
50 ml rjómi
2 tsk. vodka
Aðferð:
Setjið súkkulaði og rjóma í skál og hitið í örbylgjuofni í 30 sekúndur. Hrærið í blöndunni og endurtakið þar til súkkulaðið er bráðnað. Blandið vodka vel saman við og deilið fyllingunni í holurnar í múffunum.
Krem – Hráefni:
135 g mjúkt smjör
270 g flórsykur
2 msk. Bailey’s
1/2 msk. vodka
Aðferð:
Þeytið smjörið í 4-5 mínútur og blandið síðan restinni af hráefnunum saman við. Skreytið kökurnar með kreminu og drissið jafnvel smá rifnu súkkulaði yfir herlegheitin.
