Jose Mourinho, stjóri Manchester United, er mikið í umræðunni þessa dagana en starf hans er sagt vera í hættu.

Mourinho og félagar unnu Newcastle 3-2 í ensku úrvalsdeildinni í dag eftir að hafa lent 2-0 undir.

Tal er um það að stjórn United sé búin að missa trú á Portúgalanum sem tók við fyrir tveimur árum af Louis van Gaal.

Það er athyglisvert að skoða það sem Van Gaal hafði að segja um stjórn United á sínum tíma en hann var látinn fara þrátt fyrir að eiga töluvert eftir af samningi sínum.

,,Manchester United setti hettuna yfir mig og ég var hengdur fyrir framan alla,“ sagði Van Gaal.

,,Pressan var risastór þegar hettan var komin á mig og svo fóru þeir á bakvið mig.“

,,Það var farið að þessu eins og í kvikmynd og það fór allt fram á bakvið mig alveg frá byrjun janúar.“

,,Ég vildi aldrei vera lengur en tvö ár hjá Manchester United en þeir vildu halda mér í þrjú ár.“

,,Allt í einu var Jose Mourinho laus þegar ég var búinn með eitt og hálft ár. Ég vissi að United myndi vilja hann einn daginn.“

,,Þeir komu og töluðu við mig eftir að fréttunum var lekið á netið og það eru mestu vonbrigði sem ég hef upplifað á ævinni.“

,,Þeir ræddu ekki við mig. Ef þeir hefðu komið og talað við mig og rætt plönin þá hefði ég getað sætt mig við það en sagt að við myndum gefa allt í sölurnar næstu sex mánuðina.“

,,Þeir hefðu getað sleppt því að borga síðasta ár samningsins en eftir það sem þeir gerðu sá ég til þess að þeir myndu borga hverja krónu.“