Óhætt er að segja að átökin í borgarpólitíkinni hafi stolið senunni í sumar og ber svo við að lítt er rætt um landsmálin í pottum landsmanna, en þeim mun meira um átökin í Ráðhúsinu þar sem Vigdís Hauksdóttir hefur látið heldur betur finna fyrir sér.

Guðmundur Andri Thorsson, rithöfundur og þingmaður Samfylkingarinnar, sagði nýlega á fésbók að enginn eigi að undrast hin nýju vinnubrögð minnihlutans, hér sé farið í vandlega í smiðju Davíðs Oddssonar.

Guðmundur Andri skrifaði:

„Þegar fólk undrast „ástandið í ráðhúsinu“ – næstum dagleg upphlaup minnihlutans, sem vill láta kalla sig „stjórnarandstöðu“ – er rétt að hafa í huga að pólitískur fóstri Eyþórs Arnalds og Vigdísar Hauks er Davíð Oddsson. Í bók sem Ásdís Halla gerði eitt sinn um leiðtogafræði sagði Davíð hróðugur um veru sína í minnihluta borgarstjórnar – og verður hans pólitíska arfleifð:

„Ég gerði öll mál tortryggileg og fylgdi þeirri reglu veiðimannsins að maður má ekki einungis kasta flugu sem manni finnst falleg því að maður veit aldrei hvaða flugu laxinn tekur. Ég tók því upp öll mál, jafnvel þó að ég væri í hjarta mínu samþykkur þeim, og hjólaði í þau því að ég leit á stjórnarandstöðu sem stjórnarandstöðu.“

Guðmundur Andri benti á að þessi vinnubrögð hafi á sínum tíma skilað Davíð og félögum hans í Sjálfstæðisflokknum miklum árangri. Þeim hafi tekist að fella vinstri meirihlutann og ráðið lögum og lofum í borginni um langt skeið þar á eftir.

„Óskandi væri að kjósendur láti þá sögu ekki gerast aftur heldur styðji það fólk sem reynir að starfa í þágu borgarbúa,“ sagði þingmaðurinn.