Á morgun laugardag kl. 14 verður myndlistamaðurinn Odee með listamannaspjall um nýjustu verk sín af sýningunni „Circulum“ í Gallerí Fold.
Odee, Oddur Eysteinn Friðriksson, hefur á stuttum tíma vakið mikla athygli bæði hér heima og erlendis fyrir áhugaverða og umdeilda listsköpun.
Odee vinnur mest með svokallaða „digital fusion“ eða „visual mashup“ list, sem hann kallar samrunalist á íslensku. Þar blandar hann saman efni úr menningu samtímans og popplist til þess að skapa ný sjálfstæð verk. Áður en hann hóf listferil sinn stundaði hann nám í viðskiptafræði við Háskólann á Akureyri, með áherslu á markaðsfræði og stjórnun.
„Circulum“ kallast sýning Odee og það sem einkennir hana er form hringsins. „Þegar ég var að vinna að verkum fyrir sýninguna þá opnaðist ný vídd fyrir mér. Þessi einfalda hugmynd að breyta formi verksins í hringlaga verk í stað ferhyrnds varð til þess að nýr kafli í mínum stíl hófst,“ segir Odee.
Hvert verk er svipmynd af þeim degi sem það er skapað. Öll verkin eru samsettar klippimyndir úr menningu sem hefur haft mótandi áhrif á hann á einn eða annan hátt. Þessar táknmyndir úr menningunni fléttar hann saman í skipulagða óreiðu sem hann leikur sér svo með.
Verkin á sýningunni eru brædd í álplötur í New York með sérstakri tækni. Platan og blekið er hitað upp þannig að blekið umbreytist í gas og smýgur inn í yfirborð álsins. Síðan er verkið húðað með glærri filmu sem verndar bæði og gefur fallega áferð.
