Halldór Benjamín Þorbergsson framkvæmdastjóri Samtaka atvinnulífsins segir að tillaga VR um að endurskoða upphæð persónuafsláttar til að miða við þróun launa frá árinu 1990 sé óraunhæf og myndi kosta ríkissjóð 130 milljarða á ári. Í aðsendri grein í Markaðnum í dag segir Halldór Benjamín að ef skattleysismörk hækkuðu úr 150 þúsund krónum í 320 þúsund þá myndi tekjutap ríkissjóðs að renna 74% til þeirra tekjuhærri.

Í síðustu viku ályktaði stjórn VR að markmið félagsins í komandi kjarasamningum væri að gera lægstu laun skattfrjáls, það væri hægt að gera með því að hækka persónuafsláttinn í það sem hann var af launavísitölu árið 1990. Halldór Benjamín segir það óraunhæft:

Persónuafsláttur er 52.907 krónur á mánuði en uppreiknaður miðað við launavísitölu árið 1990 verður hann 112.881 krónur. Við það lækka mánaðarlega skattgreiðslur hvers einstaklings, sem fullnýtir afsláttinn, um tæpar 60 þúsund krónur burt séð frá því hvar hann er í tekjudreifingu. Skattleysismörk myndu þannig hækka úr tæpum 150 þúsund í tæp 320 þúsund á mánuði miðað við 4% framlag launþega í lífeyrissjóð.

Heildarkostnaður aðgerðarinnar væri metinn 130 milljarðar á ári. Til samanburðar er heildarframlag til heilbrigðismála um 190 milljarðar á ári,

segir Halldór. Af þeim kostnaði ríkissjóðs myndi 74% renna til þeirra tekjuhærri:

Við eigum að vera kröfuhörð þegar kemur að umræðu um skattkerfið. Tillagan um launavísitölutengdan persónuafslátt frá árinu 1990 myndi nánast þurrka út allar tekjur ríkissjóðs í gegnum tekjuskatt einstaklinga. Í fyrra námu þær ríflega 150 milljörðum en yrðu miðað við breytinguna um 20 milljarðar. Tekjur ríkissjóðs myndu þannig á augabragði dragast saman um 130 milljarða króna á ári.