Manchester City heimsótti Burnley í dag í ensku úrvalsdeildinni en Jóhann Berg Guðmundsson lék allan leikinn hjá Burnley.

Danilo skoraði fyrra mark leiksins á 22 mínútu en það kom eftir stutta hornspyrnu. Boltinn kom út til Danilo sem var fyrir utan teiginn, bakvörðurinn hamraði honum upp í hægra hornið. Óverjandi fyrir Nick Pope í marki Burnley.

Bæði lið fengu góð færi til að skora í síðari hálfleik og átti Jóhann Berg nokkrar öflugar fyrirgjafir sem samherjar hans nýttu sér ekki. Það var svo á 82 mínútu leiksins sem Jóhann Berg tryggði Burnley gott stig. Hann mætti á fjærstöngina og kláraði vel framhjá Ederson í marki City.

,,Þetta var frábært bolti frá Lowton, við vorum inni í leiknum allan tímann. Það er gaman að skora,“ sagði Jóhann Berg.

,,Ederson var góður, við fengum færi og skoruðum, 1-1 eru frábær úrslit fyrir okkur.“

,,Í fyrri hálfleik var þetta erfitt, það er erfitt að pressa þá því þeir vilja spila boltanum út frá markverði. Við vorum góðir í seinni hálfleik.“