Floyd Mayweather Jr., er einn sigursælasti hnefaleikamður sögunnar íhugar nú að kaupa Newcastle en það eru enskir fjölmiðlar sem greina frá þessu.

Mike Ashley, núverandi eigandi félagsins setti Newcastle á sölu í haust og hafði hann vonast til þess að selja liðið fyrir áramót.

Hann vill fá í kringum 300 milljónir punda fyrir klúbbinn og viðurkenndi Mayweather að hann gæti vel hugsað sér að eignast liðið.

„Ég elska Newcastle, fólkið þarna elskar að djamma og ég hef sjaldan skemmt mér jafn vel eins og þarna,“ sagði hnefaleikakappinn.

„Ég er alltaf opinn fyrir nýjum hugmyndum þegar kemur að fjárfestingum og ef þetta er fjárfesting sem myndi skila mér hagnaði þá gæti ég vel hugsað mér að kaupa liðið.“

„Knattspyrna er ekki alveg mín íþrótt en ég er vel tengdur á flestum stöðum og þekki fólk sem myndi aðstoða mig við reksturinn. Cristiano Ronaldo hefur lengi verið stuðningsmaður minn og ég gæti kannski fengið hann til þess að klára ferilinn hjá Newcastle,“ sagði hann að lokum.