„Læknarnir segja að það sé algjörlega fáránlegt að ég hafi lifað þetta af, og að ég eigi að vera þakklát fyrir að vera á lífi. Mér finnst ég vera óendanlega heppin akkúrat núna,“ segir ung kona sem vonast til þess að frásögn sín muni vekja almenning til umhugsunar um mikilvægi hjálma við hjólreiðaiðkun.

Tæplega 35 þúsund manns hafa deilt frásögn hinnar dönsku Stine Wad Frisk á Facebook eftir að hún birti þar átakanlega færslu síðastliðinn föstudag, ásamt sláandi ljósmyndum af sjálfri sér. Í færslunni tekur Stine fram að hún hafi dottið harkalega af hjólinu sínu, án þess að vera með hjálm.

Hún greinir frá því að hún hafi fengið heilablóðfall eða heilaslag en læknar hafi náð að stoppa það. Þá hafi hún höfuðkúpubrotnað en brotið hafi verið lagað með „4 plötum og heilum helling af skrúfum“ eins og hún orðar það í færslu sinni.

Stine segir að jafnframt hafi brotnað bein í eyranu sem leitt hafi til heyrnaskaða og þá hafi hún hlotið sjóntruflanir á öðru auganu vegna kröftugs heilahristings. Hún er nú laus af gjörgæslu en sér fram á langa spítalavist.

„Það fyrsta sem ég mun gera þegar ég kem heim er að kaupa hjálm. Myndir þú ekki gera það sama?“ spyr Stine að lokum og bætir við að fátt myndi gera hana hamingjusamari.