Malm-kommóðurnar á mörgum íslenskum heimilum – Þrjú dauðsföll hafa orðið í Bandaríkjunum
Húsgagnaframleiðandinn IKEA hefur ítrekað viðvaranir sínar til viðskiptavina vegna kommóða úr Malm-línu fyrirtækisins. Þrjú börn hafa látist í Bandaríkjunum á undanförnum misserum eftir að hafa orðið undir kommóðunum.
Malm-kommóðurnar hafa verið til sölu í verslunum IKEA um allan heim, þar á meðal Íslandi. Í júlí í fyrra sendi fyrirtækið út viðvörun vegna þeirra, en þá höfðu tveir drengir á þriðja aldursári látist eftir að hafa orðið undir kommóðunum. Í febrúar lést svo þriðja barnið eftir að hafa dregið kommóðu yfir sig.
Á heimasíðu IKEA á Íslandi segir: „Það verður að festa þetta húsgagn við vegg með meðfylgjandi veggfestingum til að koma í veg fyrir að það detti fram fyrir sig ef barn klifrar eða hangir á því.“ Þá segir að mikilvægt sé að nota skrúfur sem henta veggjum heimilisins.
Í samtali við DV segir Þórarinn Ævarsson, framkvæmdastjóri IKEA á Íslandi, að fyrirtækið hér á landi hafi ekki fengið nein skilaboð um að grípa ætti til einhverra ráðstafana vegna kommóðanna sem seldar hafa verið hér á landi. Hann segir að veggfestingar fylgi með kommóðunum og í leiðbeiningum komi skýrt fram að nota eigi festingarnar.
Hann brýnir fyrir fólki að festa kommóður, jafnt sem hillur og skápa, með veggfestingum til að koma í veg fyrir slys.
Þórarinn segir að þessar kommóður séu ekki hættulegri en aðrar kommóður, en segir aðspurður að tíðar fregnir af slysum og jafnvel dauðsföllum, megi rekja til þess að Malm-kommóðurnar eru líklega mest seldu kommóður í heiminum. „Það er hægt að velta þessu yfir sig og það á ekki bara við um kommóður heldur líka skápa, hillur og sjónvörp. Það er mikilvægt að fólk viðhafi varúð.“
Í febrúar síðastliðnum lést tuttugu og tveggja mánaða drengur í Bandaríkjunum, Ted McGee, eftir að Malm-kommóða féll ofan á hann á heimili hans í Minnesota í Bandaríkjunum. Kommóðan sem um ræðir var með sex skúffum.
Janet McGee, móðir drengsins, segir að hún hafi lagt drenginn til svefns en komið svo að honum nokkru síðar undir kommóðunni. Svo virðist vera sem hann hafi vaknað og dregið kommóðuna yfir sig. Í febrúar 2014 lést annar tveggja ára drengur, Curren Collas, þegar hann varð undir kommóða með sex skúffum og þremur mánuðum síðar lést 23 mánaða barn þegar Malm-kommóða með þremur skúffum féll ofan á það.
Viðvörunin sem IKEA sendi frá sér, og Daily Mail vitnar til, nær til 27 milljón eintaka sem IKEA hefur framleitt. Talsmaður IKEA í Bandaríkjunum segir við Daily Mail að í tilfelli McGee hafi kommóðan ekki verið fest við vegg eins og mælst er til.