Callum Brittain, leikmaður Middlesbrough, var greinilega með hugann algjörlega við baráttuna um sæti í úrvalsdeildinni um helgina, svo mikið að hann gleymdi afmælisdegi eiginkonu sinnar.
Eiginkona hans, Bethany, greindi frá þessu á samfélagsmiðlum eftir markalaust jafntefli Middlesbrough gegn Southampton í fyrri leik liðanna í undanúrslitum umspilsins.
„Ef einhverjir Boro-aðdáendur höfðu áhyggjur af einbeitingunni hans þá gleymdi hann afmælinu mínu í morgun,“ skrifaði hún létt í bragði á Instagram.
Brittain spilaði allan leikinn og hrósaði síðan stuðningsmönnum félagsins fyrir magnaða stemningu á Riverside-vellinum.
„Nú verðurðu að fara og kaupa afmæliskort fyrir konuna,“ svaraði hins vegar einn kíminn stuðningsmaður.
Middlesbrough bætti Bethany þetta upp með því að senda henni blóm, eins og sjá má hér ofar.
Seinni leikur liðanna fer fram á morgun.
