Breska hlaupakonan Eilish McCoglan hlaut slæm meiðsli á fæti í London maraþoninu sem fór fram á sunnudag. Var eins og fóturinn á henni hefði „sprungið.“

Greint er frá þessu í breska blaðinu The Sun.

McCoglan, sem er 35 ára gömul, kláraði maraþonið á tæplega 2 klukkutímum og 25 mínútum. Hafnaði hún í sjöunda sæti, efst Evrópumanna. Áhorfendur tóku hins vegar eftir því að hægri fótur hennar var blóðugur í gegnum skóinn.

McCoglan birti myndir af meiðslunum sem hún hlaut í hlaupinu á Instagram og það gerir afrek hennar enn þá áhrifameira.

Hafði ein táin bókstaflega rifnað þegar hlaupið var um það bil hálfnað og var eins og fótur hennar hefði „sprungið“. Húðin losnaði af og blóðrautt holdið var bert. Eins og gefur að skilja var sársaukinn gríðarlegur og þurfti hún að hlaupa svona í meira en klukkustund.

Fyrir utan þessi meiðsli var McCoglan að berjast við meiðsli á fótlegg og rasskinn fyrir hlaupið. Alvöru nagli á ferð.

McCoglan segir að ekki sé vitað hvað hafi valdið þessum meiðslum á fætinum. Hún hafi hvorki verið í nýjum skóm né sokkum og þeir séu ekki of litlir.

„Það eina sem mér dettur í hug er að fæturnir gætu hafa verið bólgnir?“ segir hún í færslu. „En hvað með það, ég er stolt af árangri mínum í maraþoninu. Og takk fyrir fyrir að hvetja mig yfir línuna. Þetta var geggjað og í raun það sem kom mér alla leið.“