Viðskiptaráðherra Bandaríkjanna, Howard Lutnick, fullyrti í desember að bandarísk stjórnvöld hefðu selt svokallaðar gylltar vegabréfsáritanir (e. gold card visa) fyrir um 1,3 milljarða Bandaríkjadala, eða um 163 milljarða króna. Um er að ræða sérstaka vegabréfsáritun sem gerir fólki kleift að búa og starfa í Bandaríkjunum ótímabundið, gegn því að áritunin sé keypt dýrum dómi. Ein gyllt vegabréfsáritun kostar að minnsta kosti 135 milljónir króna, eða milljón Bandaríkjadala.
Fljótlega eftir að þessar gylltu áritanir voru kynntar til sögunnar með pomp og prakt tilkynnti Lutnick að búið væri að selja áritanir fyrir 1,3 milljarða dala. Lutnick hefur nú viðurkennt að aðeins sé búið að samþykkja eina gyllta vegabréfsáritun en þó séu hundruð á biðlista. Þær verði samþykktar eftir að hafa farið í viðeigandi ferli. Lutnick fullyrti í fyrra að sala á þessum áritunum yrði gríðarleg tekjulind fyrir ríkissjóð.
