Bandarískir fjölmiðlar eru enn að fara í gegnum gífurlegt magn gagna sem hefur verið birt í tengslum við rannsókn lögreglu á brotum níðingsins og athafnamannsins Jeffrey Epsteins.
CNN hefur nú farið yfir skýrslutökur alríkislögreglunnar FBI og segir að rúmlega tugur þeirra sé mögulega trúverðugur. Þar greina þolendur frá því að Epstein og samverkamaður hans, Ghislaine Maxwell, hafi selt þær til auðugra og valdamikilla vina athafnamannsins. Þessir þolendur nefndu meðal annars háttsetta menn í fjármálageiranum (sem kenndur er við Wall Street), fyrrverandi öldungadeildarþingmann, auðugan geðlækni og kvikmyndaframleiðanda. Aðeins Epstein og Maxwell voru ákærð fyrir brotin, en yfirmaður FBI, Kash Patel, hefur fullyrt að engar trúverðugar upplýsingar séu fyrir hendi um að Epstein hafi leyft öðrum að brjóta gegn ungu konunum.
CNN rekur að ásakanir kvennana fái að vissu leyti stoð í frásögn vitna. Þessi vitni lýstu því að hafa séð til karlmanna á eyju og fasteignum í eigu Epsteins í fylgd með ólögráða stúlkum. Meðal þeirra var kona sem ferðaðist með Epsteins og kvaðst hafa séð félaga hans, Jean Luc Brunel, í fylgd með „gífurlega ungum“ stúlkum á eyjunni alræmdu. Brunel starfaði sem umboðsmaður í fyrirsætubransanum en hann var árið 2020 handtekinn og ákærður fyrir barnaníð, en svipti sig lífið í fangelsinu áður en aðalmeðferð fór fram.
Tekur CNN fram að ekki komi skýrt fram í Epstein-skjölunum hvað lögregla gerði til að kanna ásakanir kvennana og vitna í garð nafngreindra og valdamikilla manna. Leitaði miðillinn eftir svörum frá bandaríska dómsmálaráðuneytinu en fékk bara almennt svar til baka um að öllum þráðum hafi verið fylgt eftir og að ekki hafi verið forsendur til að kæra fleiri en Epsteins og Maxwell.
Dómsmálaráðuneytinu er líklega farið að leiðast sífelldar fyrirspurnir um Epstein málið sem og ítrekaðar ásakanir um hylmingu. Hjálpaði það ráðuneytinu lítið að berjast fyrst gegn birtingu Epstein-skjalanna og síðar með því að birta ekki þau gögn þar sem minnst var á Bandaríkjaforseta, Donald Trump. Er það mat sumra gagnrýnenda að rannsókn málsins hafi einkennst af klúðri sem ekki sé hægt að kenna tilteknum stjórnmálaflokki um enda um tuttugu ár liðin síðan Epstein var fyrst sakaður um kynferðisbrot.
CNN nafngreinir í frétt sinni geðlækninn Henry Jarecki, en einn þolandi Epstein, segir lækninn hafa misnotað sig eftir að Epstein sendi hana til hans. Jarecki var þá á áttræðisaldri en hann er 93 ára í dag og á erfitt með að svara fyrir ásakanir sökum heilabilunar. Hann var árið 2024 sakaður um kynferðisbrot í einkamáli sem var höfðað af konu sem nýtur nafnleyndar. Neitaði hann sök og fór svo að konan féll frá málinu á síðasta ári og tilkynnti fjölmiðlum að Jarecki hafi ekki ætlað sér að vinna henni mein og að hún hafi ekki hitt geðlækninn á vegum Epsteins. Ekki er víst hvort að konan sem höfðaði málið sé sama konan og fjallað er um í Epstein-skjölunum.
Annar þolandi nefndi kvikmyndaframleiðandann Harvey Weinstein. Epstein hafi gert henni að nudda Weinstein þegar hún var aðeins 15 ára gömul. Weinstein, sem afplánar nú dóm fyrir fjölda kynferðisbrota, neitar því að hafa þegið nudd á vegum Epsteins.
Tvær konur nefndu fyrrverandi öldungardeildarþingmanninn George Mitchell. Önnur þeirra var þekktasti þolandi Epsteins, Virginia Giuffre. Hin konan sagði Epstein hafa sent hana í tvígang til þingmannsins til að stunda með honum kynlíf. Mitchell neitar sök.
Enn annar er bankamaðurinn og fyrrum forstjóri Barclays, Jes Staley. Einn þolandi sagði bankamanninn hafa brotið gegn sér á heimili Epsteins einhvern tímann á árunum 2011-2012. Statley neitar þessu og segist ekkert hafa vitað um myrkraverk Epsteins.
Svo er það Leon Black, milljarðamæringur og athafnamaður. Tveir þolendur sökuðu Black um kynferðisbrot, en bara önnur þeirra sagði brotið hafa átt sér stað fyrir tilstuðlan Epsteins. Black neitar sök, en hann hefur í þremur aðskildum málum verið sakaður um nauðgun. Einu málinu var vísað frá, meintur þolandi féll frá málshöfðun í öðru en þriðja málið er enn í gangi.
Loks nefnir CNN að fjöldi þolenda hafi lýst því að hafa verið sendar til karlmanna sem þær kunni engin deili á. Miðillinn rekur að Epstein-skjölin segi í raun bara hálfa sögu hvað þessar ásakanir varðar þar sem ekkert liggur fyrir um hvernig lögregla brást við ásökununum og hvers vegna málin voru ekki talin líkleg til sakfellis.
Deborah Tuerkheimer, fyrrverandi saksóknari í New York, segir í samtali við miðilinn að rannsókn kynferðisbrota sé erfið, sérstaklega þegar langt er liðið frá brotum. Oft séu slík mál látin niður falla þar sem þau teljast ekki líkleg til sakfellis. Veltir hún fyrir sér hvort slík sjónarmið hafi átt við um mál Epsteins.
Nánar má lesa um málið hjá CNN.
