Mæðgurnar, hin 50 ára Antonella Di Ielsi og 15 ára dóttir hennar Sara Di Vita, voru lagðar inn á Cardarelli-sjúkrahúsið í Campobasso eftir að hafa veikst alvarlega á jóladag.
Í fyrstu töldu læknar að um hefðbundna matareitrun væri að ræða eftir máltíð sem fjölskyldan hafði neytt 23. desember.
Nú hefur rannsóknin tekið nýja stefnu eftir að sýni sem tekin voru leiddu í ljós ummerki um rísín sem er afar banvænt eiturefni. Samkvæmt ítölskum miðlum er enginn grunaður í málinu að svo stöddu.
Mæðgurnar höfðu að sögn borðað fisk og ýmiss konar sjávarfang, þar á meðal krækling, en slíkir réttir eru algengir á jólaborðum í Molise-héraði á Ítalíu.
Þær sýndu báðar sömu einkenni, þar á meðal ógleði og mikla kviðverki. Þrátt fyrir það voru þær útskrifaðar tvisvar af sjúkrahúsinu, 25. og 26. desember, þar sem læknar töldu veikindin líklega stafa af fiski eða sveppum sem einnig voru á boðstólum.
Skömmu síðar versnaði ástand þeirra hratt. Þær voru þá lagðar inn á ný, en létust báðar á sjúkrahúsinu með aðeins nokkurra klukkustunda millibili.
Í fyrstu beindist rannsóknin að mögulegum læknamistökum og þeir læknar sem útskrifuðu þær voru rannsakaðir vegna gruns um manndráp af gáleysi. Niðurstöður eiturefnarannsóknar hafa aftur á móti orðið til þess að málið er nú rannsakað sem mögulegt morð.
Fjölskyldan er frá Pietracatella, litlum fjallabæ í Molise-héraði, þar sem hún er vel þekkt. Faðirinn, Gianni, sem einnig borðaði máltíðina, lifði af en lá um tíma á gjörgæsludeild á sérhæfðu sjúkrahúsi í Róm eftir að hafa verið fluttur þangað með þyrlu í alvarlegu ástandi.
Rísín telst eitt hættulegasta náttúrulega eitur sem þekkist. Jafnvel örlítið magn getur valdið snöggri líffærabilun og dregið fólk til dauða á skömmum tíma, yfirleitt 3-5 dögum.
