Höndin og heilinn hafa þróast „hönd í hönd“ í gegnum sögu okkar prímatanna og hefur þumalfingurinn gegnt mikilvægu hlutverki í þróun hugrænnar getu okkar mannanna.

Vísindamenn við University of Reading rannsökuðu 94 prímatategundir og komust að því að þeim mun lengri sem þumalfingurinn er í samanburði við hina fingurna, þeim mun stærri er heilinn, sérstaklega svæðið sem gegnir lykilhlutverki þegar kemur að skipulagningu og talmálinu.

Þróun þumalfingursins og heilans virðist hafa haldist hönd í hönd þar sem fingrafimin fylgdi stækkun heilasvæðisins sem tengist hugsun og fleiru.

Vísindamennirnir leggja áherslu á að niðurstaðan gildi fyrir tegundir en ekki einstaklinga. Það að vera með langan þumalfingur sé því ekki ávísun á að viðkomandi sé mjög gáfaður. Lengd þumalfingursins er því ekki það sama og greindarpróf.