Jürgen Klopp nýtur mikillar virðingar og aðdáunar hjá Real Madrid eftir að Xabi Alonso var sagt upp störfum sem knattspyrnustjóri félagsins.

Samkvæmt spænskum miðlum er Klopp afar hátt skrifaður hjá stjórnendum Real Madrid, sem líta á hann sem einn fremsta þjálfara heims með skýra hugmyndafræði, sterkan karakter og mikla reynslu á hæsta stigi. Þýski stjórinn hefur sýnt það á ferli sínum, bæði með Borussia Dortmund og Liverpool, að hann getur byggt upp lið sem spilar ákafan og árangursríkan fótbolta.

Alvaro Arbeloa tekur tímabundið við Real á meðan félagið finnur arftaka Alonso sem var rekinn á fyrsta tímabili sínu með liðið.

Þrátt fyrir mikla virðingu fyrir Klopp hefur ekkert verið ákveðið á þessum tímapunkti og engar formlegar viðræður eru sagðar hafa átt sér stað. Málið er því enn á frumstigi og Real Madrid er að meta næstu skref eftir brottför Alonso.

Ekki er ljóst hvort Klopp hafi áhuga á að taka við starfinu að svo stöddu, en nafn hans mun án efa áfram vera ofarlega á lista ef spænska stórliðið ákveður að sækja reynslumikinn og karismatískan knattspyrnustjóra til félagsins.

Klopp starfar fyrir Red Bull félögin í dag sem yfirmaður knattspyrnumála og hefur látið hafa eftir sér að líkur séu á að hann þjálfi aldrei aftur.