Faðir barns í Holtaskóla í Reykjanesbæ spyr hvort að bæjarstjórn líti ekki á framkvæmdir við skólann sem forgangsmál lengur. Enn séu börnin í gámum en bærinn standi í ströngu við að stækka bæjarskrifstofurnar.

Faðirinn, Ásgeir Elvar Garðarsson, skrifar um þetta í aðsendri grein á Vísi í morgun og spyr bæjarstjórn hvar forgangsröðunin sé. Við grunnskólana eða bæjarskrifstofurnar?

„Skólasetningu grunnskólanna fylgir mikil gleði, ekki síst hjá foreldrum yngri barna sem flestir hverjir telja niður dagana þar til venjuleg rútína kemst aftur á heimilislífið. Undirritaður er þar á meðal. Ekki misskilja mig – sumarfríið hjá börnunum var frábært – en við tökum öll skólarútínuninni fagnandi,“ segir Ásgeir. „Það er hins vegar súrsætt að hugsa til þess að börn í Myllubakka- og Holtaskóla hefji nú enn eitt skólaárið í bráðabirgða gámaeiningum og enn eitt árið njóta þau ekki allra þeirra kosta sem skólar á Íslandi bjóða almennt upp á.“

Þetta hafi mikil áhrif á börnin. Þau hafi ekkert mötuneyti og þurfa að borða nesti og hádegismat í heimastofunum sínum. Aðgangur að verk- og listgreinum sé verulega eða alfarið skertur. Þá er ekkert skólabókasafn til staðar sem kemur sér einkar illa fyrir þau sem eru að taka sín fyrstu skref í lestri.

Peningurinn í annað

Tekur hann það fram að starfsfólk skólanna, Myllubakka- og Holtaskóla, eigi allt hrós skilið fyrir seiglu, aðlögunarhæfni og umburðarlyndi í þessum aðstæðum. Allt starf hafi verið endurskipulagt til að hægt sé að halda uppi eins eðlilegu skólastarfi og mögulegt sé. En verklok í skólunum þurfi að vera í fremsta forgangi.

„Sjálfur bý ég í þeirri góðu trú að verklok við þessa tvo skóla hafi alltaf verið í fremsta forgangi hjá bæjarfélaginu, en af fréttaflutningi þessa árs að dæma læðist að mér sá grunur að svo sé staðan ekki lengur,“ segir Ásgeir. „Þegar maður les um að bærinn standi í ströngu við að stækka bæjarskrifstofurnar, kaupa húsnæði háskóla Keilis á Ásbrú og setja upp tímabundnar bæjarskrifstofur í því húsi, stækka Hljómahöllina og flytja bókasafnið þangað, þá heyrast sögur af því að ekki sé til peningur til að greiða verktökum sem starfa í Myllubakka- og Holtaskóla og að hægja eigi á framkvæmdum við skólana vegna fjárskorts hjá bænum.“

Þrýsta á bæjaryfirvöld

Hér sé hugsanlega um stefnubreytingu að ræða. Það er að skólarnir séu ekki lengur í fyrsta forgangi.

„Mögulega lítur bæjarstjórn Reykjanesbæjar ekki lengur á þessar framkvæmdir sem fremsta forgangsmál þar sem þökk sé öflugu skipulagi skólastjórnenda gengur allt smurt fyrir sig í núverandi ástandi,“ segir Ásgeir að lokum. „Ég vil því með þessari grein hvetja foreldra jafnt sem starfsmenn skólanna að láta ekki af þrýstingi á bæjaryfirvöld, að framkvæmdirnar við skólana verði áfram í fremsta forgangi og að allt kapp verði lagt í að klára þessar framkvæmdir sem allra fyrst.“