Þorgerður Katrín Gunnarsdóttir utanríkisráðherra segist ekki vera hlynnt því að stofnuð verði sérstök leyniþjónusta á Íslandi. Er þetta á skjön við það sem kom fram í frétt í The Economist. Þar segir orðrétt: „Landið gæti ein­angr­ast ef sæ­streng­ir þess yrðu rofn­ir. Það hef­ur enga leyniþjón­ustu til að elta uppi skemmd­ar­varga og njósn­ara. Þor­gerður seg­ist styðja stofn­un slíkr­ar [leyniþjón­ustu],“ segir í greininni í The Economist. Morgunblaðið greinir frá en Vísir greindi fyrst frá.

Þorgerður segir í viðtali við Morgunblaðið að mikilvægt sé að Ísland efli eigin greiningargetu til að verða ekki að öllu leyti háð öðrum þjóðum við mat á hættu og ógn sem steðjar að. Það sé hægt að gera með því að efla netör­ygg­is­sveit­ina CERT-IS og grein­ing­ar­deild Rík­is­lög­reglu­stjóra.

Um viðkvæmt mál sé að ræða en Ísland geti ekki leyft sér neina einfeldni á þessu sviði í ljósi þeirrar heimsmyndar sem við blasi. „Spurð að því hvernig hún sjái fyr­ir sér að efla CERT-IS og grein­ing­ar­deild Rík­is­lög­reglu­stjóra vís­ar ut­an­rík­is­ráðherra til sam­ráðshóps þing­manna vegna mót­un­ar ör­ygg­is- og varn­ar­stefnu sem senn mun skila af sér niður­stöðum vinnu sinn­ar. Vinna hóps­ins verður grunn­ur að stefnu rík­is­ins í varn­ar- og ör­ygg­is­mál­um,“ segir í frétt Morgunblaðsins.

Rætt er við Arnór Sigurjónsson, sérfræðing í varnarmálum, sem tekur undir með Þorgerði um að efla þurfi greiningargetu á hérlendis á þessu sviði. Hann tekur ekki afstöðu til þeirrar spurningar hvort þörf sé á íslenskri leyniþjónustu. Skemmdarverkastarfsemi Rússa sé ógn sem Ísland þurfi að bregðast við með aukinni greiningargetu.