Nístandi sorg ríkti í portúgalska þorpinu Gondomar nú í morgun þegar útför bræðranna Diogo Jota og Andre Silva fór fram. Bræðurnir létust í hræðilegu bílslysi á fimmtudag þegar dekk á Lamborginhi-bifreið þeirra sprakk með þeim afleiðingum að bíllinn hentist út af veginum og gjöreyðilagðist.

Diogo, 28 ára, var heimsþekktur knattspyrnumaður sem spilaði fyrir Liverpool en bróðir hans Andre, sem var 25 ára gamall, spilaði fyrir neðri deildar lið í heimalandinu.

Auk fjölskyldu og vina bræðranna voru liðsfélagar Diogo hjá Liverpool og portúgalska landslinu áberandi við jarðaförina. Virgil Van Dijk, fyrirliði Liverpool, hélt á blómaskreytingu í líki fótboltatreyju með númeri Diogo, 20, hjá félaginu. Liðsfélagi hans, bakvörðurinn Andy Robertson, hélt á sambærilegri skreytingu sem bar númerið 30 en með það númer spilaði Andre á bakinu.

Þá mátti sjá portúgalskar knattspyrnuhetjur úr öðrum liðum eins og Bruno Fernandes, liðsmann Manchester United, og Bernardo Silva, liðsmann Manchester City, við athöfnina. Talsverða athygli hefur vakið að portúgalska goðsögnin, Cristiano Ronaldo, er hvergi sjáanlegur en hann minntist Jota með hjartnæmum hætti á samfélagsmiðlum eins og fjölmargir aðrir knattspyrnumenn.

Ekkja Jota, hin 28 ára gamla Rute Cardoso, sást ganga hágrátandi inn í kirkjuna en saman átti hún og Jota þrjú ung börn. Knattspyrnufélagið Liverpool hefur ákveðið að halda áfram að greiða laun knattspyrnumannsins til fjölskyldunnar næstu tvö árin, út samningstíma Jota hjá félaginu.

Samkvæmt umfjöllun erlendra miðla voru þúsundir syrgjenda mættir til Gondomar, sem er skammt frá stórborginni Porto. Aðeins nánustu vinir og fjölskylda fengu að fara inn í kirkjuna en útförinni var síðan streymt á skjái fyrir utan kirkjuna fyrir þá sem mættu og vildu votta bræðrunum virðingu sína.