Helgi Fannar Sigurðsson skrifar frá Sviss

Katla Tryggvadóttir átti flotta innkomu í fyrsta leik Íslands á EM, 1-0 tapi gegn Finnum. Hún var sátt við sína innkomu en segir hana engu máli skipta í stóra samhenginu.

Katla segir að landsliðið hafi hætt að spá í tapinu gegn Finnum strax í gær og hausinn kominn á leikinn við Sviss á sunnudag. Liðið fékk heimsókn frá Höllu Tómasdóttur forseta Íslands í gær og svo var frjáls tími við fjölskyldum leikmanna seinni partinn.

„Við sögðum skilið við það strax daginn eftir. Við fengum góða ræðu frá Höllu T. Hún knúsaði okkur allar, sagði að við værum ótrúlega flott og gaf okkur nokkur góð orð,“ sagði Katla við 433.is í dag.

Ísland og Sviss voru saman í Þjóðadeildinni í vetur og þekkja liðin hvort annað því vel.

„Leikurinn horfir vel við mér. Við þekkjum þær ansi vel eftir að hafa spilað við þær og leikgreint nokkrum sinnum. Þær þekkja okkur og við þær. Svo snýst þetta bara um hver vill vinna þennan leik á sunnudag.“

Katla var ánægð með sína innkomu og væri auðvitað til í að byrja næsta leik en virðir auðvitað ákvörðun landsliðsþjálfarans, hver svo sem hún verður.

„Það var gaman að spila og ég er stolt af þeim áfanga að spila á stórmóti. En í stóra samhenginu er það aukaatriði. Við erum hér saman að vinna að sameiginlegu verkefni.

Maður er í fótbolta til að spila en svo er það alltaf þjálfarinn sem velur liðið. Maður tekur það hlutverk og neglir það.“

Katla er fyrirliði sænska liðsins Kristianstad og var orðin það fyrir tvítugt.

„Það var ótrúlega mikill heiður og ég er ótrúlega þakklát fyrir það traust sem þjálfararnir sýna mér. Þetta kom mér í raun smá á óvart en er ótrúlega mikill heiður.“

Nánar í spilaranum.