Lagið „Stundir“ er nýjasta útgáfa tónlistarmannsins Svavars H. Viðarssonar, sem samdi bæði lag og texta. Söngurinn er í höndum Ernu Hrannar, sem túlkar lagið með hlýju og næmni sem fer beint að hjartanu.

„Stundir“ segir frá djúpri tengingu tveggja einstaklinga sem er sönn og óumflýjanleg. En lífið spilar ekki alltaf með; tímasetningar, aðstæður eða óvissa innan í okkur sjálfum geta komið í veg fyrir að samband nái að blómstra. Í það minnsta í fyrstu. Samt skín vonin skært í gegnum lagið: „Allt fer eins og það á að fara.“ Þegar rétta stundin rennur upp. Augnablikið sem lætur hjörtun slá í takt. Þá verður allt skyndilega skýrt, líkt og örlögin taki við og færi okkur nær hvort öðru.

Með sumarlegum popptónum og tilfinningaþrunginni sögu er Stundir lag sem hentar bæði löngum kvöldgöngum og dýpri íhugun. Það minnir okkur á að lífið hefur sína eigin tímasetningu og stundum verður allt rétt þegar við síst búumst við því.

Svavari tekst enn og aftur að fanga tilfinningar með laginu, sem stenst fyllilega samanburð við fyrri verk hans.

Vignir Snær Vigfússon annaðist upptökustjórn, útsetningu og hljóðblöndun og tryggði að lagið flæði mjúklega inn í eyru og hjörtu hlustenda. Biggi Tryggva sá um hljómjöfnun, og dreifingu annast Alda Music.