Diddy er ákærður fyrir mansal með kynferðislega misnotkun í huga, að standa fyrir flutningi fólks í tengslum við vændi og skipulagða glæpastarfsemi.
Trump og P. Diddy voru góðir vinir hér áður fyrr og Trump sótti mörg af partíum Diddy. Það er fyrrum erkióvinur Diddy sem fyrstur setti fram spádóminn um að Trump muni náða þennan gamla vin sig og það útilokar Trump ekki að gera.
Fréttamaður Fox News spurði Trump út í hugsanlega náðun á fréttamannafundi í Hvíta húsinu fyrir helgi. Hann sagðist ekki hafa fengið neina opinbera beiðni um hugsanlega náðun en lagði áherslu á að hann útiloki ekkert í þessum efnum.
„Ég mun örugglega skoða staðreyndirnar. Ef mér finnst að einhver hafi ekki hlotið sanngjarna málsmeðferð, þá skiptir engu hvort viðkomandi líkar við mig eða ekki,“ sagði Trump.
Þar vísaði hann til vináttu hans og Diddy hér áður fyrr. Eins og áður sagði, þá sótti Trump mörg af partíum Diddy og þegar hann hélt upp á þrítugsafmælið sitt mætti Trump fyrstur allra.
Samband þeirra breyttist þegar Trump hóf afskipti af stjórnmálum. „Honum líkaði mjög vel við mig, en ég held að þegar ég byrjaði í pólitík, þá hafi sambandið hrunið miðað við hvað ég hef lesið, ég veit það ekki. Hann hefur ekki sjálfur sagt það við en ég las nokkur óheppileg ummæli í blaðinu,“ sagði Trump.
Það var Suge Knight, erkióvinur Diddy, sem afplánar 28 ára dóm fyrir manndráp af gáleysi, sem spáði því að Diddy muni á einn eða annan hátt komast hjá því að sitja í fangelsi.
„Ég held ekki að Diddy hafi áhyggjur af alríkismálinu og ef hann verður sakfelldur, þá mun Trump náða hann,“ sagði Suge Knight.
