Eins hreyfils flugvél var nauðlent á Suðurlandsvegi á tólfta tímanum í gærkvöldi eftir að vélin varð vélarvana. Í dagbók lögreglu kemur fram að flugmaður hafi sloppið ómeiddur frá atvikinu en töluverðar aðgerðir fóru fram við að koma vélinni af vettvangi.

Fréttastofa Vísis birti myndband af nauðlendingunni sem Ástþór Ernir Hrafnsson tók. „Það kemur flugvél rétt hjá okkur og tekur beygju. Hreyfillinn er augljóslega ekki í gangi. Svo lendir hún bara á þjóðveginum, skoppar þar,“ segir hann við Vísi.

Lögregla og Rannsóknarnefnd flugslysa rannsaka nú málið.

Einn gistir fangageymslur lögreglu eftir nóttina og eru alls 65 mál bókuð í kerfum lögreglu á tímabilinu frá klukkan 17 í gær til klukkan 5 í morgun.

Tilkynnt var um umferðarslys í umdæmi lögreglunnar í Hafnarfirði þar sem ökumaður mótorhjóls missti stjórn á því og hafnaði utan vegar. Hann reyndist óslasaður en hjólið var laskað eftir óhappið.

Þá var tilkynnt um umferðarslys í umdæmi lögreglustöðvar 3, sem sinnir Kópavogi og Breiðholti, þar sem bifreið var ekið á grindverk og endaði utan vegar. Ökumaður var með minniháttar eymsli en bifreiðin var óökufær eftir óhappið og var dregin af vettvangi.