TV2 segir að tilkynnt hafi verið um hvarf Ole þann 12. janúar á síðasta ári eftir að ættingjar hans höfðu ekki heyrt frá honum dögum saman eða síðan síðdegis á gamlársdag.
Tveimur vikum síðar fann lögreglan brunnar líkamsleifar í tjaldi við sveitabæ í Løten. Rannsókn leiddi í ljós að þetta voru líkamsleifar Ole.
Eigandi býlisins, 43 ára kona, var handtekin samdægurs, grunuð um morð eða aðild að morði. Dagbladet segir að þegar ákæra var gefin út á hendur henni, hafi verið fallið frá ákæru fyrir aðild að morði og konan ákærð fyrir morð og ósæmilega meðferð á líki.
VG segir að konan sé ákærð fyrir að hafa orðið Ole að bana með því að lemja hann í höfuðið með öxi um klukkan 21.50 á gamlárskvöld 2023. Síðan er hún sögð hafa hlutað líkið í sundur og kastað líkamshlutunum á bál.
Konan hefur alla tíð neitað sök og haldið því að hún hafi gegn vilja sínum orðið vitni að því þegar þrjár manneskjur myrtu Ole.
Ekki hefur verið skýrt frá hvað rak konuna til að myrða Ole, ef hún þá gerði það, en norskir fjölmiðlar segja að þau hafi eitt sinn verið kærustupar.
