Hin ráðagóða Abby hefur svarað lesendum bandarískra fjölmiðla síðan á sjötta áratug síðustu aldar. Hún hefur verið svo vinsæl að eftir að hin upprunalega Abby, Pauline Esther Phillips, lést árið 2013 tók dóttir hennar, Jeanne Phillips, við keflinu.

Abby tekst á við ýmislegt sem brennur á lesendum hennar og endurspegla svör hennar stundum breytingar í samfélaginu sem fólk hefur ekki endilega áttað sig á.

Kattareigandi leitaði ráða hjá Abby og sagði konan að hún hefði farið í ferðalag og vinkona hennar lofað að passa köttinn á meðan. Það loforð var hins vegar svikið.

„Ég bað nýlega vinkonu mína um að passa köttinn minn á meðan ég var í burtu í nokkra daga. Við komumst að samkomulagi um að hún myndi koma við daglega til að gefa kettlingnum mínum að éta, fylla á vatnið og eyða smá tíma með kettlingnum.

Þegar ég kom til baka tók ég eftir nokkrum merkjum um að hún hefði ekki komið við á hverjum degi, ósnertir matardallar, sandkassinn fyllri en hann ætti að vera og mjög einmana og hávær köttur.

Ég hef ekki enn rætt við vinkonu mína, en ég er særð og vonsvikin. Ég treysti henni fyrir umönnun gæludýrsins míns. Ég hefði gert aðrar ráðstafanir ef ég hefði vitað að hún gæti ekki skuldbundið sig.

Ég vil ekki draga of miklar ályktanir, en mér finnst ég líka ekki geta bara vísað þessu frá mér. Hvernig nálgast ég þetta samtal án þess að blása það upp úr öllu hófi eða eyðileggja vináttuna, en samt sem áður benda á að þetta hafi ekki verið í lagi?“

Abby svaraði kattareigandanum og sagði best að gera aðrar ráðstafanir framvegis:

„Maður getur aðeins velt því fyrir sér með hvaða öðrum hætti þessi vinkona er ábyrgðarlaus. Hins vegar mæli ég ekki með því að „setja hana út í kuldann“.

Í framtíðinni, þegar þú ætlar að ferðast, gerðu aðrar ráðstafanir varðandi umönnun kattarins þíns. Þessi manneskja var ekki alveg fullkomin fyrir það hlutverk.“