Fall Leicester úr ensku úrvalsdeildinni varð staðfest í fyrradag með 0-1 tapi gegn Liverpool. Jamie Vardy skóf ekki af því í yfirlýsingu sem hann gaf út í kjölfarið.
Leicester hefur tapað 16 af síðustu 18 leikjum sínum og er aðeins með 18 stig eftir 33 leiki. Liðið kom upp úr B-deildinni í fyrra en er nú fallið á ný.
„Ég veit ekki einu sinni hvað skal segja. Ég get ekki lýst því hversu reiður og leiður ég er yfir því hvernig þetta tímabil hefur farið. Það eru engar afsakanir. Við höfum brugðist sem hópur og sem félag,“ sagði Vardy, sem hefur verið hjá Leicester í um 13 ár og unnið Englandsmeistaratitilinn með liðinu.
„Ég hef upplifað svo miklar hæðir og lægðir. Þetta tímabil hefur verið ömurlegt og algjörlega skammarlegt fyrir mig persónulega. Ég vil biðja aðdáendur afsökunar á að hafa endað tímabilið á þennan hátt.“
Ruud van Nistelrooy tók við sem stjóri Leicester í nóvember en tókst ekki að snúa gengi liðsins við. Óljóst er hvort hann verði áfram.
