Eiginkona fyrrverandi knattspyrnustjóra hefur lýst því fyrir dómi að hún telji að eiginmaður hennar hafi orðið fyrir einelti í starfi áður en hann tók eigið líf.
Matt Beard, fyrrum þjálfari kvennaliðs Liverpool, lést 47 ára gamall í september á síðasta ári eftir að hafa sagt upp starfi sínu hjá Burnley mánuði áður.
Við yfirheyrslu fyrir rétt í Wales kom fram að fjölskylda hans hefði áhyggjur af líðan hans eftir dvölina hjá Burnley. Eiginkona hans, Debbie Beard, sagði að hann hefði ekki verið ánægður í starfi og að hann hefði ekki fengið að yfirgefa félagið á eigin forsendum.
„Hann hætti ekki til að fara annað, heldur vegna þess að honum leið illa. Ég tel að þeir hafi lagt hann í einelti,“ sagði hún.
Fram kom að andleg líðan Beard hefði versnað eftir að hann hætti hjá Burnley og að það hefði verið kveikjan að alvarlegri þróun.
Dómari málsins hefur ákveðið að kalla eftir frekari gögnum, meðal annars frá knattspyrnuumboðsmanni og samtökum knattspyrnustjóra, til að varpa frekara ljósi á málið.
Beard náði miklum árangri á ferli sínum, þar á meðal með Chelsea og Liverpool þar sem hann vann tvo Englandsmeistaratitla í röð.
Útför hans var fjölmenn og sóttu hana fjölmargir úr knattspyrnuheiminum.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
